ပဲပင်ပေါက်စားသုံးပေးရင် ရရှိနိုင်မယ့် အကျိုး (၆)​မျိုး

    ပဲပင်ပေါက်လို့ပြောလိုက်ရင် ထွေထွေထူးထူးပြောစရာမလိုဘဲတောင် လူတိုင်းလိုလိုသိထားပြီးဖြစ်ပါတယ်။ ပဲပင်ပေါက်ကို ကြော်စားလို့ရသလို အသုပ်တွေထဲမှာလည်း ထည့်ထည့်သုပ်ပြီးတော့ပဲဖြစ်ဖြစ်၊ ဟင်းချိုချက်ပြီးတော့ပဲဖြစ်ဖြစ်၊ အချဉ်စိမ်ပြီးတော့ပဲဖြစ်ဖြစ် စားလေ့ရှိကြပါတယ်။ ဒီလိုစားလို့ကောင်းတဲ့ ပဲပင်ပေါက်ကို နေ့တိုင်းစားသုံးပေးရင် ဘယ်လိုအကျိုးကျေးဇူးတွေရရှိမလဲဆိုတာ ဆက်ပြီးဖတ်ကြည့်လို့ရပါတယ်။

ပဲပင်ပေါက်စားရင် ရရှိမယ့် ကျန်းမာရေးအကျိုးကျေးဇူးတွေက ဘာတွေလဲ

    ပဲပင်ပေါက်က အာဟာရဓါတ်ကြွယ်ဝသလို ခန္ဓာကိုယ်အတွက်လိုအပ်တဲ့ ဗီတာမင်နဲ့ သတ္တုဓါတ်တွေကြွယ်ဝစွာပါဝင်နေတာကြောင့် ကျန်းမာစေနိုင်ပါတယ်။

၁) ကိုယ်ခံအားကောင်းစေတယ်

    ပဲပင်ပေါက်မှာ ဗီတာမင်စီပါဝင်တာကြောင့် ကိုယ်ခံအားကိုကောင်းစေနိုင်ပြီး ရောဂါပိုးတွေကူးစက်မှုကနေ အထိရောက်ဆုံးကာကွယ်ပေးနိုင်ပါတယ်။ ဓါတ်တိုးဆန့်ကျင်အာနိသင် ပါဝင်နေတာကြောင့်ခန္ဓာကိုယ်ကို ကျန်းမာစေပြီး ဇီဝကမ္မလုပ်ငန်းစဉ်တွေကို အကောင်းဆုံးလည်ပတ်စေနိုင်ပါတယ်။ဗီတာမင်အေ ပါဝင်နေတာကြောင့်လည်း ခန္ဓာကိုယ်ကို အကောင်းဆုံးထောက်ပံ့ပေးနိုင်ပါတယ်။

၂) ဇီဝကမ္မဖြစ်စဉ်တွေကိုကောင်းမွန်စေနိုင်ပါတယ်

    ပဲပင်ပေါက်မှာ ဇီဝကမ္မဖြစ်စဉ်တွေကို အကောင်းဆုံးလည်ပတ်စေနိုင်ဖို့ ထောက်ပံ့ပေးနိုင်တဲ့ အင်ဇိုင်းတစ်မျိုးပါဝင်ပါတယ်။ ဒီအင်ဇိုင်းကို အခြားစားစရာတွေကနေရရှိဖို့ ခက်ခဲပါတယ်။ ဒါ့အပြင် ပဲပင်ပေါက်မှာ ဆဲလ်တွေဖြစ်ပေါ်မှု၊ ကိုယ်တွင်းအင်္ဂါတွေ ကျန်းမာအောင်ထောက်ပံ့ပေးမှုနဲ့ ကြွက်သားတွေ ကျန်းမာသန်စွမ်းအောင်လုပ်ဆောင်ပေးတဲ့ ပရိုတင်းက ကြွယ်ဝစွာပါဝင်ပါတယ်။ အရိုးနဲ့ကြွက်သားတွေသန်မာပြီး ကိုယ်တွင်းအင်္ဂါတွေကျန်းမာစေဖို့ စားသုံးပေးသင့်ပါတယ်။

၃) အစာခြေစနစ်ကို ကျန်းမာစေနိုင်တယ်

    ပဲပင်ပေါက်မှာပါတဲ့အင်ဇိုင်းက အစာခြေစနစ်ကို ကျန်းမာစေနိုင်ပြီး အူနံရံတွေကို အာဟာရဓါတ်တွေအကောင်းဆုံးစုပ်ယူနိုင်အောင် ထောက်ပံ့ပေးနိုင်ပါတယ်။ အမျှင်ဓါတ်ကြွယ်ဝတာကြောင့် ဝမ်းချုပ်တာကနေ ကင်းဝေးစေပါတယ်။

၄) ဝိတ်ကျစေနိုင်တယ်

    ကယ်လ်လိုရီပါဝင်မှုနည်းပြီး ခန္ဓာကိုယ်အတွက်အကျိုးပြုတဲ့ ဗီတာမင်နဲ့ သတ္တုဓါတ်တွေ ပေါများစွာပါဝင်ပါတယ်။ အမျှင်ဓါတ်ပါဝင်မှုကြောင့် အဆာခံနိုင်စေပြီး ကိုယ်အလေးချိန်ချချင်သူတွေ နေ့တိုင်းစားသုံးပေးသင့်ပါတယ်။

၅) သွေးအားနည်းတာကို သက်သာစေနိုင်တယ်

    ခန္ဓာကိုယ်မှာ သံဓါတ်နည်းလာတဲ့အခါ သွေးအားနည်းရောဂါကို ခံစားရနိုင်ပါတယ်။ ဒီတော့ သံဓါတ်ချို့တဲ့မှုကြောင့် သွေးအားနည်းတာ၊ အစာခြေစနစ်ပြဿနာတွေ ခံစားရတာ၊ ခြေကုန်လက်ပမ်းကျတာ၊ အမောမခံနိုင်တာတွေမဖြစ်စေဖို့အတွက် ပဲပင်ပေါက်လေးကို စားသုံးပေးသင့်ပါတယ်။ ပဲပင်ပေါက်မှာပါတဲ့ သံဓါတ်နဲ့ ကော့ပါးဓါတ်တွေက ခန္ဓာကိုယ်ထဲမှာ သွေးနီဥဆဲလ်တွေဖြစ်ပေါ်စေပြီးကိုယ်တွင်းသွေးလည်ပတ်မှုကို ကောင်းစေနိုင်ပါတယ်။

၆) အမြင်အာရုံကောင်းစေနိုင်တယ်

    ဗီတာမင်အေကြွယ်ဝတာကြောင့် အသက်အရွယ်ကြောင့်ဖြစ်တဲ့ အမြင်အာရုံပြဿနာတွေကို အထိရောက်ဆုံးကာကွယ်ပေးနိုင်ပါတယ်။ မျက်စိအတွင်းတိမ်ဖြစ်တာကိုလည်း ကာကွယ်ပေးနိုင်ပါတယ်။ဒါကြောင့် မျက်လုံးအရမ်းအာရုံစိုက်ပြီး အလုပ်လုပ်နေရသူတွေအတွက် ပဲပင်ပေါက်ဟာ ဆေးတစ်ခွက်ဖြစ်ပါတယ်။

    ပဲပင်ပေါက်ရဲ့ကျန်းမာရေးကောင်းကျိုးလေးတွေသိရပြီးဆိုတော့ ပဲပင်ပေါက်လေးကိုတစ်ပတ်ကို ၃ ကြိမ်လောက်တော့ စားသုံးပေးဖို့အကြံပေးချင်ပါတယ်။

Reference : hellosayarwon.com