တစ်ပတ်စာ ဈေးကွက်သုံးသပ်ချက် (၃၁.၈ -၄.၉.၂၀၂၆)

အိမ်နီးချင်းနိုင်ငံများ၏ ဝယ်လိုအားနှင့် ဈေးကွက်မျှော်လင့်ချက်ကြောင့် ပို့ကုန်ပဲများနှင့် ပြည်တွင်းစားသုံးသည့် ပဲအချို့ ဈေးမာလာသည်။ သို့သော် ပြောင်းက ယခုရက်သတ္တပတ်တွင် ဈေးအနည်းငယ် ငြိမ်လာသည်။

မတ်ပဲ ပြည်တွင်းဈေးပြန်တက်

ယခုရက်သတ္တပတ် ပြည်တွင်းဈေးကွက်တွင် ဈေးနှုန်းအားပျော့နေသော မတ်ပဲက စက်တင်ဘာ ၃ ရက်နေ့တွင် ရုတ်တရက် ဈေးတက်လာသည်။

အိန္ဒိယနိုင်ငံအတွင်း ပွဲတော်ကာလ ဝယ်လိုအား အပြောင်းအလဲ၊ မိုးရာသီစိုက်ပျိုးသည့် မတ်ပဲအသစ်ပေါ်ရန် အချိန်လိုနေမှု၊ မြန်မာနိုင်ငံအတွင်း မတ်ပဲ လက်ကျန် လျော့နည်းမှုတို့က မတ်ပဲဈေး ပြန်မာရေးအပေါ် တွန်းအားဖြစ်စေသည်ဟု သုံးသပ်ချက်များလည်း ရှိနေသည်။ တစ်ဖက်တွင်လည်း ဘရာဇီးမတ်ပဲ တင်သွင်းမှု တိုးနိုင်သည့် အခြေအနေနှင့် စက်တင်ဘာ မတ်ပဲအထွက်နှုန်းက ဈေးကွက်ပေါ် သက်ရောက်မှုရှိလာမည်ဟု ခန့်မှန်းနေကြသည်။

ယခုရက်သတ္တပတ် အိန္ဒိယဈေးကွက်တွင် မြန်မာမတ်ပဲ FOB ဈေးက မတ်ပဲ FAQ တစ်တန် အမေရိကန်ဒေါ်လာ ၈၄၀၊ မတ်ပဲ SQ တစ်တန် ဒေါ်လာ ၉၂၀ ဈေးဖွင့်သည်။

မြန်မာနိုင်ငံ ဈေးကွက်တွင် မတ်ပဲ ပြည်ပရောင်းချသည့် FOB ဈေးက တည်ငြိမ်နေသည်။ မတ်ပဲ FAQ တစ်တန် ဒေါ်လာ ၈၂၅/၈၃၅၊ မတ်ပဲ SQ တစ်တန် ဒေါ်လာ ၉၀၅/၉၁၅ ဈေးဖွင့်သည်။

ပြည်တွင်းဈေးကွက်တွင် မတ်ပဲ FAQ က တစ်တန် ကျပ် ၃,၄၀၄,၀၀၀ ဖြင့် ဈေးစတင်ခဲ့ပြီး ၃,၃၉၄,၀၀၀ အထိ ဈေးဆင်း၍ စက်တင်ဘာ ၃ တွင် ကျပ် ၃,၄၂၀,၀၀၀ သို့ ဈေးပြန်ပြောင်းသည်။ မတ်ပဲ SQ ကလည်း တစ်တန် ကျပ် ၃,၇၀၄,၀၀၀ မှ ၃,၆၉၄,၀၀၀ သို့ ဈေးဆင်းပြီး ၃,၇၃၅,၀၀၀ သို့ ဈေးပြန်ပြောင်းသည်။

ပြည်တွင်းဈေး ဆက်တိုက်မာနေသည့် ပဲစင်းငုံ

အိန္ဒိယနိုင်ငံအတွင်း ပွဲတော်များအတွက် ဝယ်လိုအားရှိနေသည့် ပဲစင်းငုံက မြန်မာပြည်တွင်းဈေးကွက်တွင် တစ်တန် ကျပ် ၃၄ သိန်းအထက်သို့ ရောက်လာသည်။

အိန္ဒိယဈေးကွက်တွင် အာဖရိက ပဲစင်းငုံများနှင့် ဈေးကွက်ပြိုင်ဆိုင်နေရသည့် မြန်မာပဲစင်းငုံက ယခုရက်သတ္တပတ်တွင် FOB တစ်တန်လျှင် ဒေါ်လာ ၈၃၅ ဈေးဖွင့်သည်။

အယ်လ်နီညို ရာသီဥတု၏ သက်ရောက်မှုအပေါ် စိုးရိမ်နေသည့် အိန္ဒိယအစိုးရက အရံသိုလှောင်ထားသော ပဲစင်းငုံများကို ဆက်ကိုင်ထားသည်။ ထို့ကြောင့် ပြည်ပတင်သွင်းမှု အခြေအနေ အပြောင်းအလဲနှင့် ပြည်တွင်း ဝယ်လိုအားက ဈေးကွက်အပေါ် သက်ရောက်မှုရှိနေသည်။

မြန်မာဈေးကွက်တွင် ပဲစင်းငုံ ပြည်ပရောင်းချသည့် FOB ဈေးက ငြိမ်နေပြီး ပြည်တွင်းဈေးက ရက်သတ္တပတ်အတွင်း ပဲတစ်တန် ကျပ် ၉၀,၀၀၀ ခန့် ဈေးတက်လာသည်။ ပဲစင်းငုံ (နီ) FOB ဈေးက ပဲအဟောင်းတစ်တန် ဒေါ်လာ ၇၆၀/၇၇၀၊ ပဲသစ်တစ်တန် ဒေါ်လာ ၇၉၀/၈၀၀ ဈေးဖွင့်သည်။

ယခုရက်သတ္တပတ် (စက်တင်ဘာ ၃ ရက်အထိ) ပဲစင်းငုံ (နီ) ပြည်တွင်းဈေးက တစ်တန် ၃,၃၂၅,၀၀၀ မှ ၃,၄၁၅,၀၀၀ သို့ ဈေးပြောင်းသွားသည်။

ပြောင်းဈေး အပြောင်းအလဲ

အခွန်ကင်းလွတ်ခွင့်ဖြင့် ပြောင်းတင်သွင်းမှုကို ထိုင်းနိုင်ငံမှ ရပ်ဆိုင်းလိုက်သော်လည်း လာမည့်နှစ်အတွက် ပြောင်းသီးနှံအပေါ် မျှော်လင့်ချက်များ ရှိနေသည်။

တစ်နှစ် ပြည်ပမှ ပြောင်းတန်ချိန် ၄ သန်းကျော် တင်သွင်းနေရသည့် ထိုင်းနိုင်ငံ၏ မွေးမြူရေးအစားအစာ ထုတ်လုပ်ရေး ကဏ္ဍကြီးက ပြောင်းတင်ပို့သူများအတွက် ဈေးကွက်ကြီးတစ်ခု ဖြစ်နေသည်။

လက်ရှိ ပြည်တွင်းပြောင်းဈေးက ရန်ကုန်ဈေးကွက်တွင် ဈေးငြိမ်နေပြီး မန္တလေးဈေးကွက်တွင် ဈေးအနည်းငယ် ပြန်ဆင်းလာသည်။ ရန်ကုန်ဈေးကွက်တွင် ပြောင်း FOB ဈေးက တစ်တန် ဒေါ်လာ ၂၇၀/၂၈၀ ဈေးဖွင့်သည်။ ပြည်တွင်းပြောင်းဈေးက တစ်ပိဿာ ကျပ် ၁,၇၈၀/၁,၈၀၀ ဈေးဖွင့်သည်။

ပြီးခဲ့သည့် ရက်သတ္တပတ် မန္တလေးဈေးကွက်တွင် ရှမ်းပြောင်း တစ်တန် ကျပ် ၁,၀၃၀,၀၀၀ ကျော် ဈေးဖွင့်သော်လည်း ယခုရက်သတ္တပတ်တွင် ၉၈၆,၀၀၀ ကျော်သို့ ဈေးပြန်ဆင်းသည်။ CP ပြောင်းသစ်ကလည်း တစ်တန် ကျပ် ၁,၁၃၀,၀၀၀ ကျော်မှ ၁၀ သိန်းကျော်သို့ ဈေးပြောင်းသွားသည်။

ပဲကြီးဈေးမာ

ပြည်တွင်း အဓိကစားသုံးသည့် ပဲကြီးက ယခုရက်သတ္တပတ်တွင် ပြည်တွင်းဈေးသာမက ပြည်ပဈေးလည်း အနည်းငယ် မာလာသည်။

ရန်ကုန်ဈေးကွက်တွင် ပြည်ပရောင်းချသည့် ပဲကြီး FOB ဈေးက ပဲတစ်တန် ဒေါ်လာ ၈၀ ဈေးတက်လာသည်။ ပဲကြီးတစ်တန် ဒေါ်လာ ၁,၉၉၅/၂,၀၀၅ မှ ၂,၀၇၅/၂,၀၈၅ သို့ ဈေးပြောင်းသွားသည်။

သို့သော် ပြည်တွင်းဈေးက ပဲကြီး (ကုန်း) တစ်ပိဿာ ကျပ် ၁၂,၆၉၅/၁၃,၀၄၅၊ ပဲကြီး (ရွှေကျွန်း) တစ်ပိဿာ ကျပ် ၁၄,၅၁၀/၁၅,၀၄၅ ဖြင့် ဈေးဖွင့်သည်။

ပြည်တွင်းဈေးကွက်တွင် ပဲကြီးက အမျိုးအစားအလိုက် ဈေးနှုန်းအပြောင်းအလဲများ ရှိနေသည်။ လက်ရှိ လုပ်ငန်းသမားများ ပုံမှန်အဝယ်ရှိနေသဖြင့် ယခုရက်သတ္တပတ် မန္တလေးဈေးကွက်တွင် ပဲကြီး (ကြီး) က တစ်တန် ကျပ် ၁ သိန်းဝန်းကျင် ဈေးတက်လာသည်။

ပဲကြီး (ကြီး) တစ်တန် ကျပ် ၈,၆၄၀,၀၀၀ ကျော်မှ ၈,၇၅၀,၀၀၀ ကျော်သို့ ဈေးပြောင်းသွားသည်။ ပဲကြီး (လတ်) တစ်တန် ကျပ် ၈,၃၁၀,၀၀၀ ကျော်၊ ပဲကြီး (သေး) တစ်တန် ကျပ် ၈,၂၅၀,၀၀၀ ကျော် ဈေးဖွင့်သည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။