ကြက်သွန်နီဈေး သိသိသာသာ ဆက်တိုက်မြင့်တက်နေ

လက်ရှိ ကြက်သွန်နီ ဈေးနှုန်းများ ဆက်တိုက် မြင့်တက်လာပြီး တစ်ပိဿာလျှင် ကျပ်တစ်သောင်းနီးပါးအထိ ရှိလာကြောင်း ဈေးကွက်အတွင်းမှ သိရသည်။

မြန်မာ့ကြက်သွန်နီ ဈေးကွက်အနေဖြင့် စက်တင်ဘာလ နောက်ဆုံးပတ်မှစ၍ ဈေးနှုန်းများ သိသိသာသာ ဆက်တိုက်မြင့်တက်လာခဲ့ခြင်းဖြစ်ပြီး လက်လီဈေးကွက်၌ တစ်ပိဿာလျှင် ကျပ် ၁၀,၀၀၀ နီးပါးအထိ စံချိန်တင် ပေါက်ဈေးရှိနေကြောင်း သိရသည်။

ယခင်နှစ်များနှင့် မတူဘဲ ပြည်ပအဝယ်လိုက်ခြင်းနှင့် ပြည်တွင်း စိုက်ပျိုးထုတ်လုပ်မှု လျော့နည်းခြင်းတို့ကြောင့် ဈေးတန်းအမြင့်တွင် တည်ငြိမ်နေခြင်းဖြစ်ကြောင်း ကုန်သည်အချို့က သုံးသပ်ထားကြသည်။

လက်ရှိ ဆိပ်ဖြူ ကြက်သွန်နီမှာ အရွယ်အစားနှင့် အရည်အသွေးပေါ် မူတည်၍ တစ်ပိဿာလျှင် ကျပ် ၇,၅၀၀ မှ ၉,၂၀၀ ကျပ်၊ မုံရွာ ကြက်သွန်နီမှာ တစ်ပိဿာလျှင် ကျပ် ၇,၇၀၀ မှ ၉,၃၀၀ အထိ ပေါက်ဈေးရှိကြောင်း ဘုရင့်နောင် ကုန်စည်ဒိုင်မှ သိရသည်။

ယင်းအပြင် လက်လီဈေးများနှင့် ပြန်ကျတန်းများတွင် အရွေးသန့် အလုံးကြီးများမှာ တစ်ပိဿာလျှင် ကျပ် ၈,၀၀၀ မှ ၁၀,၀၀၀ ကျော်အထိ ရောင်းချနေခြင်းများလည်း ရှိကြောင်း သိရသည်။

"လက်ရှိ နယ်ဘက်မြို့တွေမှာ ရာသီဥတု အခြေအနေက မကောင်းတော့ မိုးက အဆက်မပျက် ရွာနေတယ်။ ရေကြီးရေလျှံတာတွေဖြစ်ပြီး သယ်ယူပို့ဆောင်ရေး လမ်းကြောင်းတွေ မကောင်းတော့ ကုန်စည်စီးဆင်းမှု နှေးကွေးသွားတယ်။ ရန်ကုန် ကားအဝင်နည်းပြီး လက်လီဈေးတွေမှာ ဈေးတွေ အဆမတန် တက်လာတာ။ ဒီရက်ပိုင်းမှာကို ဆက်တိုက်ဆိုသလို တက်လာတာ ကျပ် ၁၀,၀၀၀ နားကပ်နေပြီး တချို့ ကျပ် ၁၀,၀၀၀ ကျော်ထိကို ရှိနေပြီ" ဟု ကြက်သွန်ကုန်သည်တစ်ဦးက ပြောသည်။

ရန်ကုန် ဘုရင့်နောင်ကုန်စည်ဒိုင်သို့ နယ်စုံမှ ကြက်သွန်နီ ကုန်တင်ကား အဝင်သည် လက်ရှိ စက်တင်ဘာလကုန်ပိုင်းတွင် တစ်ရက်လျှင် ပျမ်းမျှ ၁၂ စီးမှ ၁၆ စီးဝန်းကျင်ခန့်သာ ဝင်ရောက်နိုင်ပြီး ပုံမှန်ထက် သိသိသာသာ နည်းပါးနေကြောင်းလည်း သိရသည်။

ယခင်နှစ်များက ဈေးနှုန်းအလွန်အမင်း ကျဆင်းခဲ့သဖြင့် စိုက်ပျိုးတောင်သူများ အစိုက်ဧက နည်းသွားခြင်းနှင့် ရာသီဥတုဒဏ်ကြောင့် ယခုနှစ်တွင် နွေကြက်သွန် အထွက်နှုန်း လျော့ကျကာ လက်ကျန်နည်းပါးလာခြင်းဖြစ်ကြောင်းလည်း သိရသည်။

"အရင်နှစ်တွေက ဈေးမရလို့ ကြက်သွန်စိုက်တောင်သူတွေရော၊ လှောင်တဲ့ ကုန်သည်တွေရော အားလုံး အရှုံးပေါ်ပြီး ဘဝပျက်ခဲ့ရတာတွေ များတယ်။ ဒီနှစ်မှာတော့ ပြည်ပနဲ့ အပြိုင် ဈေးဆွဲတင်နေရလို့ ဈေးတွေ တက်လာတာပါ။ တောင်သူလက်ထဲမှာတော့ လက်ကျန်နည်းနေပြီဖြစ်လို့ အကျိုးအမြတ် အပြည့်အဝ ရမှာ မဟုတ်ဘူး။ ကုန်သည်တွေ၊ လှောင်သူတွေကတော့ အကျိုးအမြတ် ရနိုင်ပါတယ်။ ဒါပေမဲ့ ကြက်သွန်အသစ်တွေ ပေါ်တော့မည်။ ၁၁ လပိုင်းအတွင်းတော့ ဈေးပြန်ကျနိုင်တယ်" ဟု ကြက်သွန် စိုက်ပျိုးရောင်းချသူ ကုန်သည်တစ်ဦးက ပြောသည်။

လက်ရှိ တရုတ်၊ ထိုင်း၊ ဗီယက်နမ်နှင့် ဘင်္ဂလားဒေ့ရှ်နိုင်ငံများသို့ မြန်မာ့ကြက်သွန်နီ တင်ပို့မှု အားကောင်းနေခြင်းကြောင့် ပြည်တွင်း၌ ဈေးကွက် အပြိုင်အဆိုင်ဖြစ်ပြီး ဈေးတက်လာရခြင်းဖြစ်ကြောင်း သုံးသပ်ထားကြသည်။

ယင်းကဲ့သို့ စံချိန်တင် ကြက်သွန်နီဈေးများ အဆမတန် မြင့်တက်နေသော်လည်း တောင်သူအချို့မှာ လက်တွေ့တွင် အကျိုးအမြတ် အပြည့်အဝ မရရှိဘဲ အခက်အခဲများနှင့် ရင်ဆိုင်နေရကြောင်းလည်း သိရသည်။

မြန်မာနိုင်ငံတွင် ကြက်သွန်နီကို ပခုက္ကူ၊ မုံရွာ၊ မြင်းခြံ၊ တောင်သာ၊ ရေစကြိုနှင့် ဆိပ်ဖြူဒေသများတွင် အများဆုံး စိုက်ပျိုးလျက်ရှိသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။