မြေနီမှာ ပြောင်းကြဲလို့ရလားနှင့် တစ်ပတ်အတွင်း စိတ်ဝင်စားစရာ အမေးအဖြေများ

မင်္ဂလာပါရှင့်

စိတ်ဝင်စားစရာ အမေးအဖြေတွေကို လေ့လာရမယ့် စနေနေ့လေးကနေ ကြိုဆိုလိုက်ပါတယ်နော်။

ဒီတစ်ပတ်မှာတော့ ဦးကြီးတို့ ဇဝေဇဝါဖြစ်ကြလေ့ရှိတဲ့ မေးခွန်းလေးတွေကို ရွေးထုတ်ပြီး ဖော်ပြပေးလိုက်ပါတယ်ရှင့်

၁။ မေး (Ko Thet) ဆရာကြီးများခင်ဗျာ။ တချို့ကပြောကြတယ် ယူရီးယားဓာတ်မြေဩဇာကို မြေခံမထည့်ရဘူးလို့တဲ့။တစ်ချို့ကြပြန်တော့လဲမြေခံထည့်ရတယ်လို့ပြောကြတယ်။ ဘယ်ဟာယုံရမှန်းမသိလို့ရှင်းပြပေးစေချင်ပါတယ်ခင်ဗျာ။

ဖြေ (  ဒို့ဦးလေး) - နှစ်ခုစလုံး မှန်တယ်လို့ပြောနိုင်ပါတယ်။ ယူရီးယားကို မြေခံထည့်ရင် မျိုးစေ့ကို မထိခိုက်ရင် အပင်ပေါက်သန်နိုင်တာကိုး။ သို့ပေမယ့်..ဓာတ်လျော့မြန် တဲ့အတွက် ဆုံးရှုံးနိုင်ချေပိုများပါတယ်။ ဥပမာ..၁၀၀ ဖိုးထည့်ရင် ၃၀ ဖိုးလောက်ဘဲ အပင်စားရတယ်ပေါ့။ ချင့်ချိန်သုံးပါလေ...။

၂။ မေး ( Ye Kyaw) - အပင်မှုန်းတယ်ဆိုတာ ဘာကိုပြောတာလဲဗျ နောက်ပြီးပြောင်းပန်းခိုင်မထွက်ခင် ပြောင်းရွက် ခြွေပေးဖို့လည်းလိုလို့လား။ ခြွေရင်ရောဘာကောင်းလဲဗျ။ အခုက ၅လပိုင်းထဲမှာဆိုတော့ ပြောင်းထပ်ကြဲချင်တာမို့ ထယ်ရေးလုပ်ဖို့ မှီသေးလားဗျ။

ဖြေ (ဒို့ဦးလေး) – “မှုန်း” တယ်..ဆိုတာ.ချေမှုန်း/သုတ်သင်/ဖယ်ရှား တယ်လို့ အဓိပ္ပာယ်ရပါတယ်။ အပင်ဦးရေ နည်းအောင်၊ ပါးအောင် သားခွဲပေးရတာကိုပြောတာပါ။ လက်နဲ့ သားခွဲသလို ထွန်နဲ့ ကန့်လန့် မှုန်းတာလဲ..ပြုလုပ်ကြပါတယ်။ ပြောင်းကြဲလို့မီပါသေးတယ်။ အောက်ရွက်ဟောင်းခြွေတာကတော့.. လုပ်နိုင်ရင်ကောင်းပါတယ်။

၃။ မေး (ကျော်ကျော်) - မြေနီ မာ ပြောင်းကြဲချင်လို့ အဆင်ပြေနိုင်လားဗျ။ ကြက်ချေးအိတ်၁၅၀ ဖြန့်ထားတယ် ၈ ဧက လောက်ရှိပါတယ်။ အဲမြေမှာ တခါမှ မလုပ်ဖူးပါဘူး သူများက ပေးကြဲလို့ပါ။

ဖြေ (ဒို့ဦးလေး) - အဆင်ပြေပါတယ်.. တခါမှ မစိုက်ဖူးသေးတဲ့ မြေနီက ပိုပြီးအာဟာရ ရနိုင်ပါတယ်။ ပေါင်း နဲ့ ပိုးကို ကာကွယ်ပါ။

၄။ မေး (Myo Myint) - ငရုတ်ခင်း မိုးစွေပြီး စိုထိုင်းနေလို့ ကျောက်မှုန့်ပက်ရင် အဆင်ပြေလားဗျ ?

ဖြေ (ဒို့ဦးလေး) - အဆင်ပြေပါတယ်ဗျ။

ကျောက်မှုန့်ပက်ပေးရင် မြေကြီးထဲက မှိုလည်း အထိုက်အလျောက်ကာကွယ်ပါတယ်။ အပင်အခြေအနေကြည့်ပြီး လိုအပ်ရင်မှိုဆေးဖျန်းပါ။

(ဦးတင်ဝင်း) - အဆင်ပြေပါတယ်။ မှိုမတက်ဘူးပေါ့။

၅။ မေး (Ko Chit Myat Maung) - မိုးစပါးအတွက် လယ် ၁ ဧကကိုယ် မြေဩဇာ ဘယ်နှစ်ခါကျွေးသင့်လဲ မြေဩဇာ ဘယ်နှစ်အိတ်ကျွေးသင့်လဲ။

(ဒို့ဦးလေး) - ပုလဲ၂ အိတ် တီစူပါ၁ အိတ် ပိုတက် ၁ အိတ်ကို ပုံမှန်မြေသားအတွက်ကျွေးသင့်ပါတယ်။ ကုန်ကျစရိတ်တွေတော့..မပြောတတ်ဘူးပေါ့ဗျာ။ အဲဒီနှုန်းထားကို ၃ ပုံပုံပြီး ၁ ပုံကို မြေခံထည့်ပါ။ နောက် ၁ ပုံကို အပင်ပွားချိန်နဲ့ နောက်ဆုံးချိန် ဖုံးလုံးချိန် ကျွေးပါ။

တခြားမိတ်ဆွေတောင်သူတွေလည်း ဒီလိုမျိုးအကြံဉာဏ်တွေရယူချင်တယ်ဆို အမေးအဖြေကဏ္ဍမှာ ပို့စ်တင်မေးလို့ရနေပါပြီနော်။ ရှေ့တစ်ပတ်က တိုက်သွားတဲ့ မိုခါမုန်တိုင်းကြောင့် ဘာတွေများပျက်စီးသွားကြသေးလဲရှင့်။ ပြုပြင်လို့ရမဲ့နည်းတွေကို ဆရာတို့က ဖြေပေးနေပါပြီ။ အားမနာတမ်း ပို့စ်တင်မေးနိုင်ပါကြောင်း သတင်းကောင်းပေးရင်း ဒီတစ်ပတ်တော့ ဒီလောက်နဲ့ပဲ အဆုံးသတ်လိုက်ပါဦးမယ်။

ဆောင်းပါးများ/ သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။