ဩဂဲနစ်သီးနှံများ၊ ဒေသထွက်ကုန်များ ပါဝင်ရောင်းချနိုင်မည့် ‘စိမ်းစိုငြိမ်းအေး..ဩဂဲနစ်ဈေး’ ပြန်လည်ဖွင့်လှစ်မည်

ဩဂဲနစ်သီးနှံများ၊ ဒေသထွက်ကုန်များ၊ ရိုးရာအစားအစာများ စသည်တို့ ပါဝင်ရောင်းချနိုင်မည့် ‘စိမ်းစို ငြိမ်း အေး..ဩဂဲနစ်ဈေး’ ကို လာမည့် နိုဝင်ဘာ ၅ ရက်(စနေနေ့) ကစပြီး အပတ်စဉ် စနေနေ့တိုင်း ပြန်လည်ဖွင့်လှစ်သွားမည်ဟု သိရသည်။

ယခုဩဂဲနစ်ဈေးတွင် (၁) ဩဂဲနစ်စိုက်ခင်းလက်မှတ် ရရှိပြီးသူများ၏ သီးနှံများ၊ (၂) ဩဂဲနစ်စနစ်သို့ အသွင်ကူးပြောင်းနေသူများ၏ သီးနှံများ၊ (၃) GAP လက်မှတ်ရသီးနှံများနှင့် သဘာဝပစ္စည်းများ၊ (၄) မြန်မာ့ရိုးရာလက်မှုပစ္စည်းများ၊ ဒေသထွက်ကုန်များ၊ ရိုးရာအစားအစာများ နှင့် (၅) ဘေးအန္တရာယ် လုံခြုံစိတ်ချရသော စားသောက်ကုန်များ စသည်ဖြင့် အုပ်စု ၅ စု ပါဝင်ရောင်းချနိုင်မည်ဖြစ်ကြောင်း သိရသည်။

“ ဩဂဲနစ်ထုတ်ကုန်တွေရဲ့ဈေးကွက်ရဖို့ရယ်၊ နောက်ထပ် အစားအစာဘေးကင်းမှုပေါ့။ စားသုံးသူ အန္တရာယ်ကင်းရှင်းရေးပေါ့နော်။ အဲ့ဒီအတွက်ရယ်။ နောက်ပြီးတော့ ဩဂဲနစ်ကို စားသုံးချင်သူတွေ ရှိတယ်။ ဒါပေမဲ့ ဘယ်မှာဝယ်ရမှန်းမသိဘူးပေါ့နော်။ ဒီ့အတွက် ထုတ်လုပ်သူနဲ့ စားသုံးသူကြားမှာ ချိတ်ပေးတာပါ။ ဒါကြောင့် ဒီလို ဩဂဲနစ်ဈေးလေးတွေကို စီစဉ်ပေးနေတာပေါ့” ဟု ဩဂဲနစ်ဈေးဦးဆောင်ဖွင့်လှစ်သူတစ်ဦးဖြစ်သူ ‘သာသည့်မြေသို့’ အဖွဲ့မှ ဒေါ်ဝင်းဝင်းမိုးက ပြောသည်။

‘ စိမ်းစိုငြိမ်းအေး...ဩဂဲနစ်ဈေး’ များကို ၂၀၂၁ ဖေဖော်ဝါရီမတိုင်ခင်ထိ ရန်ကုန်နှင့် မန္တလေးမြို့များတွင် ဖွင့်လှစ်ခဲ့ဖူးပြီး ယခုအခါ ရပ်ထားရာမှ ပြန်လည်ဖွင့်လှစ်ခြင်းဖြစ်ကာ အပတ်စဉ်ဖွင့်လှစ်သွားနိုင်ရန် စီစဉ်နေသည်ဟု သိရသည်။

“ အရင်ဩဂဲနစ်ဈေးတွေ ဖွင့်တုန်းကလည်း လာဝယ်တဲ့သူတွေများတယ်။ စားသုံးကြည့်ပြီး စိတ်ချလက်ချနဲ့ စိတ်ကျေနပ်မှုလည်း ရှိကြတယ်ပေါ့။ သူတို့ဘက်ကလည်း ဒီ ဩဂဲနစ်ဈေးတွေ ပြန်ဖွင့်ဖို့ တောင်းဆိုလာတာတွေရှိတယ်။ အဲ့ဒီအတွက် ပုံမှန်ဖွင့်နိုင်အောင် ကြိုးစားနေပါတယ် ” ဟု ဒေါ်ဝင်းဝင်းမိုးက ဆိုသည်။

ယခုစတင်ဖွင့်လှစ်သည့်အပတ်တွင် ဈေးဖွင့်လှစ်မည့် Shangri-La Serviced Apartments မှသူများကိုသာ ရောင်းချပေးသွားမည်ဖြစ်ပြီး နောက်ပိုင်းတွင်မူ အခြားနေရာများတွင်ပါ ဆက်ဖွင့်ပြီး အားလုံးကို ရောင်းချပေးသွားရန် စီစဉ်နေသည်ဟုလည်း ဒေါ်ဝင်းဝင်းမိုးက ပြောသည်။

ယခု ပထမဆုံးပြန်ဖွင့်မည့် ‘ စိမ်းစိုငြိမ်းအေး...ဩဂဲနစ်ဈေး’ ကို ရန်ကုန်မြို့၊ မင်္ဂလာတောင်ညွန့်မြို့နယ်၊ ကန်ရိပ်သာလမ်း၊ Shangri-La Serviced Apartment တွင် ပြုလုပ်သွားမည်ဖြစ်ပြီး ပါဝင်ရောင်းချလိုသူ များအနေဖြင့် ဒေါ်ဝင်းဝင်းမိုး (ဖုန်း - ၀၉ ၂၅၀၆၅၁၇၆၇) နှင့် ကိုဝင်းဇော်ထွန်း ( ဖုန်း - ၀၉ ၉၇၈၅၅၄၅၄၆၅) တို့ထံ ဆက်သွယ်လျှောက်ထားနိုင်သည်ဟု သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။