အထက်ပိုင်းတွင် ရေဘေးရှောင်ရမှုများရှိလာပြီး လကုန်ပိုင်းတွင် မြစ်ကြီးနားနှင့် မန္တလေးကြားလည်း သတိထားရန်လို

မြန်မာပြည်အထက်ပိုင်းမှာ မြစ်ရေမြင့်တက်မှုတွေကြောင့် ရွှေကူ၊ ကသာ၊ ဗန်းမော်မြို့တွေဘက်မှာ ရေဘေးရှောင်ရမှုများရှိလာနေပြီး အခုလကုန်ပိုင်းကျရင်တော့ မြစ်ကြီးနားနဲ့ မန္တလေးကြားမှာလည်း ရေကြီးနိုင်တဲ့အခြေအနေတွေဖြစ်လာနိုင်လို့ သတိထားဖို့လိုမယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင်က ခန့်မှန်းပါတယ်။

မြန်မာနိုင်ငံမီးသတ်တပ်ဖွဲ့ရဲ့ ဇွန် ၁၇ နဲ့ ၁၈ ရက် ထုတ်ပြန်ချက်တွေအရ ကချင်ပြည်နယ်၊ ဗန်းမော်ခရိုင်အတွင်း ဧရာဝတီမြစ်ရေမြင့်တက်မှုကြောင့် လူနေအိမ်တချို့ကို ရွှေ့ပြောင်းပေးခဲ့ရတယ်လို့ ဆိုပါတယ်။ မနေ့က ထုတ်ပြန်ချက်တွေအရ ဗန်းမော်-မန္တလေးလမ်းပိုင်းတချို့မှာလည်း ကားလမ်းမပေါ်ရေကျော်မှုတွေ ဖြစ်ပွားနေလို့ ကြိုတင်ကာကွယ်ရေးလုပ်ငန်းတွေလုပ်ဆောင်ခဲ့ရတယ်လို့ သိရပါတယ်။

လက်ရှိ နိုင်ငံတကာမိုးလေဝသသတင်းထုတ်ပြန်ချက်တွေအရဆိုရင် လကုန်ပိုင်းမှာ မုတ်သုံလေအားပြန်ကောင်းလာပြီး မိုးများလာနိုင်လို့ အဲ့ဒီလို အထက်ပိုင်းဒေသတွေတင် မကဘဲ မြစ်ကြီးနား-မန္တလေး ကြားထိ မြစ်ရေမြင့်တက်မှုတွေရှိလာနိုင်ပြီး ရေဘေးအန္တရာယ်ရှိလာနိုင်တယ်လို့ ဦးဝင်းနိုင်က သုံးသပ်ပြောကြားပါတယ်။

“ အခု ကျွန်တော် တစ်မြို့ချင်းလိုက်ကြည့်တော့ ဧရာဝတီမြစ်စတဲ့ ကချင်ပြည်နယ်ရယ်၊ ချင်းတွင်းမြစ်စတဲ့ ကချင်ပြည်နယ်မှာပဲ စတာပေါ့နော်။ တနိုင်းတဲ့ ချီဖွေပေါ့။ အဲ့ဒီနှစ်ခုကို ကြည့်လိုက်တော့ မိုးရေချိန်တော်တော်များတယ်။ အခုလောလောဆယ်မှာက ပုံမှာလည်းတွေ့လိမ့်မယ်၊ မြစ်ကြီးနားအောက်ဘက်ကနေ ဟိုး မန္တလေးအထိပေါ့။ အနီရောင်တွေဖြစ်လာပြီ။ တချို့စိမ်းနေတဲ့နေရာ နည်းနည်းလေးပဲ ကျန်တော့တာပေါ့။ လိမ္မော်ရောင်နဲ့ အနီရောင်အဆင့်တွေဖြစ်လာတာပေါ့။ နောက်ပြီးတော့ ရေမျက်နှာပြင်တွေတက်လာတယ်။ ဆိုတော့ အထက်က မိုးဆက်ပြီးတော့ကျရင် အောက်ဘက်ကိုပါ ဆက်ပြီးတော့ဆင်းတော့မှာပဲ။ ဆင်းတော့မှာပဲဆိုတာက မန္တလေးနဲ့ ပခုက္ကူ၊ ညောင်ဦးပေါ့နော်။ စသဖြင့် အောက်ဘက်တွေအထိ ဆက်ဆင်းပြီးတော့ အဲ့ဒီအချိန်နဲ့ လကုန်ပိုင်း မိုးများလာ မယ့်အချိန် မုတ်သုံလေအားပြန်ကောင်းပြီးတော့ ဇူလိုင်လထဲမှာ မိုးများလာမယ့်အချိန်၊ အထက်ရေကလည်း လျော့ မသွားပဲနဲ့ ဆက်ပြီးတော့ မိုးကောင်းနေမယ့်အချိန်၊ အောက်မှာလည်း မိုးရွာပြီးတော့ မိုးကောင်းမယ့်အချိန်မျိုးဆိုရင်တော့ ကျိန်းသေတာက မန္တလေးနဲ့ မြစ်ကြီးနားကြားက သေချာပေါက် ရေကြီးတော့မယ်” လို့ ဦးဝင်းနိုင်က Green Way ကို ပြောပါတယ်။ 

အခုအတိုင်းဆိုရင်တော့ ဒီလ ၂၉၊ ၃၀ လောက်မှာ တစ်နိုင်ငံလုံးအတိုင်းအတာနဲ့ မိုးရွာတဲ့အခြေအနေ ပြန်တက်လာနိုင်လို့ နောက်တစ်ပတ်ကနေ ၁၀ ရက်အတွင်းလောက်ကို ရေဘေးအန္တရာယ်သတိထားရတော့မှာဖြစ်ပြီး မန္တလေးအထက်ကတော့ ဖြစ်နိုင်ချေပိုများတယ်လို့ ဦးဝင်းနိုင်က သတိပေးပါတယ်။ 

မိုးများလာနိုင်မယ့်အထိမှာ မြန်မာပြည် အလယ်ပိုင်းဒေသတွေတော့မပါသေးဘဲ ကြားထဲမှာ ထူးခြားတဲ့မုန်တိုင်းဖြစ်လာနိုင်ချေသာမရှိရင် လက်ရှိအခြေအနေအတိုင်း မိုးနည်းပြီး လေပြင်းတိုက်နေဆဲအခြေအနေဟာ ဇူလိုင်လကုန်အထိဆက်ပြီး ရှိနေဦးမယ်လို့ ဦးဝင်းနိုင်က ခန့်မှန်းပါတယ်။

“ အခုတစ်မြို့ချင်းလိုက်ကြည့်တော့ ညောင်ဦးဆိုရင် လကုန်အထိကို မိုးက တစ်မှုန်နှစ်မှုန်တောင် ကျမယ့်သဘောမရှိဘူး။ တော်တော်ကိုနည်းတယ်” လို့ ဦးဝင်းနိုင်က ဆိုပါတယ်။

လက်ရှိ နိုင်ငံတကာ မိုးလေဝသထုတ်ပြန်ချက်တွေအရ ဇူလိုင်လကုန်အထိ ဘင်္ဂလားပင်လယ်အော်နဲ့ ကပ္ပလီပင်လယ်ပြင်တွေမှာ မုန်တိုင်းဖြစ်နိုင်ခြေမရှိသေးဘူးလို့ သိရပါတယ်။

Photo Crd _Win Naing FB, Myanmar Fire Service Department FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။