မုန်တိုင်းအထိနိုင်ဆုံးနေရာများနှင့် လမ်းကြောင်း Update (ဆရာဦးဝင်းနိုင် ခန့်မှန်းချက်)

“ ဒီနေ့ update လမ်းကြောင်းအတိုင်းဆိုရင် ငဝန်မြစ်၊ ပုသိမ်၊ ငပုတောကနေ ဟိုင်းကြီးကျွန်း ပင်လယ်ဝဘက်မှာ အဆိုးဆုံးဖြစ်ပါမယ်။ မေ ၁၃ - ၁၄ ဖြစ်မယ်။ ၁၄ ကတော့ target date ပါ။ ကုန်းတွင်းကိုဝင်မဲ့နေ့ပေါ့။ အဲ့ဒီနေ့မှာ ညာဘက်ခြမ်းက လေရောမိုးရော အပြင်းထန်ဆုံးဖြစ်လာမှာပါ။ လေတိုက်နှုန်း ၉၀ ကျော်အထိရှိနိုင်ပြီး ပုသိမ်အထိ ငဝန်မြစ်တွင်းဒီလှိုင်းက ၁၃ ပေလောက်အထိ ရှိသွားနိုင်ပါမယ်”

“လက်ရှိခန့်မှန်းချက်အတိုင်းဆို အဆိုးဆုံးဖြစ်သွားနိုင်တာကတော့ ဧရာဝတီတိုင်းရဲ့ မြို့တော် ပုသိမ်ပဲ။ မြစ်ဝကျွန်းပေါ်ကမ်းရိုးတန်းတစ်လျှောက်ကလူတွေလည်း ကယ်ထုတ်ဖို့ ရွှေ့ပြောင်းဖို့အတွက် လိုပြီ။ လွတ်ရာပြောင်းဖို့ တိုင်ပင်ကြရတော့မယ်။ တစ်ပတ်ပဲ အချိန်ရှိတော့တာ။ လူဦးရေက သန်းနဲ့ချီနေတယ်”

“ နောက်တစ်ခုက မုန်တိုင်းက ပင်လယ်ကနေလာပြီးရင် ကုန်းတွင်းမုန်တိုင်း လေဖိအားနည်း အဖြစ်ပြောင်းသွားမယ်။ ဂွနဲ့ ချောင်းသာကြားကဝင်ပြီးရင် နေပြည်တော်ပျဉ်းမနားပေါ်လည်း ရောက်မယ်။ နမ့်စမ်မှာ ဂိတ်ဆုံးမှာ။ မြေပြင်အနေအထားအရ အားပျော့တာက ပိုလည်း မြန်ချင်ရင် မြန်သွားနိုင်တယ်” 

“ ကုန်းတွင်းမုန်တိုင်းဖြတ်တဲ့ဒေသတွေမှာတော့ မိုးများမယ်။ တချို့နေရာတွေ ၇ လက်မ ၈ လက်မလောက်အထိ ရွာနိုင်တယ်။ မုန်တိုင်းကုန်းတွင်းကိုဝင်ပြီး အရှေ့မြောက်ဘက်ကို ဖြတ်တဲ့အခါ ရခိုင်ရိုးမနဲ့ ပဲခူးရိုးမတွေကို ဖြတ်ရမယ့် မြေပြင်အနေအထားတွေကြာင့်တော့ မြန်မြန်အားပျော့ ပျက်ပြယ်သွားနိုင်တယ်။ ကုန်တွင်းမုန်တိုင်းအခြေအနေမှာတော့ လေပြင်းတိုက်နိုင်မယ်၊ လေပွေအကြီးစားတွေဖြစ်နိုင်တယ်၊ မိုးကြိုးတွေပစ်နိုင်တယ်၊ တောင်ကျချောင်းရေတွေကျပြီး ရေကြီးနိုင်တယ်၊ တံတားတွေကျိုးနိုင်တယ် ဆိုတဲ့ သဘာဝဘေးအန္တရာယ်ပေါင်းစုံ ဖြစ်လာနိုင်ပါတယ်။ မုန်တိုင်းတည့်ဝင်တဲ့နေရာတွေလောက်တော့ အန္တရာယ်မများဘူး။ ဉာဏ်နဲ့ယှဉ်ပြီး ဘေးလွတ်အောင် ရှောင်တတ်ကြဖို့တော့ လိုပါမယ်”

"နောက်ဆုံး Update တွေမှာက မုန်တိုင်းလမ်းကြောင်းနဲ့ အင်အားပြောင်းလဲမှု အလွန်နည်းသွားပြီ။ ကြိုတင်ခန့်မှန်း model တွေရဲ့ လမ်းကြောင်းခန့်မှန်းချက်တွေ တည်ငြိမ်လာတာ တွေ့ရတယ်” 

“ နောက်ဆုံးရတဲ့ GFS 07MAY0000Z update အရလည်း အင်အားလမ်းကြောင်းမပြောင်းတော့ဘူး ကုန်းတွင်းဝင်မဲ့နေရာတော့ မိုင် ၅၀ လောက်မြောက်ဘက်ကို တက်သွားတယ်၊ သက်ရောက်မှုကတော့ ဒီအတိုင်းပဲ ဆက်ရှိနေပါဦးမယ်” 

(မေ ၆ ရက် မနေ့ကတင်ထားသည့် အောက်ပါပို့စ်နှင့် ဆက်စပ်ဖတ်ရှုနိုင်ပါသည်)

https://greenwaymyanmar.com/posts/Weather%20forecast_May_6

 Photos Crd_U Win Naing

#(ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။