ကြက်ဟင်းခါးသီး အရမ်းမခါးအောင်ကြော်နည်း

ကြက်ဟင်းခါးသီးကြော်ဆိုရင် အများအားဖြင့် ခါးတဲ့ အရသာ ရှိတာတော့ လူတိုင်းသိမှာပါ..။ အခါးကြိုက်တဲ့ သူတွေအတွက်တော့ ပြဿနာမရှိပေမယ့် ကြက်ဟင်းခါးသီးလည်းစားချင်၊ ခါးလည်းသိပ်မခါးချင်ဘူးဆိုတဲ့သူတွေ အတွက်တော့ အခက်အခဲတစ်ခုရှိနိုင်ပါတယ်..။

အဲ့ဒီလို ခါးသက်သက်အရသာမကြိုက်သူတွေအတွက် ကြက်ဟင်းခါးသီး အရမ်းမခါးရအောင် ကြော်လို့ရတဲ့ နည်း လေးကို ပြောပြပေးပါမယ်။

ကြက်ဟင်းခါးသီး အရမ်းမခါးအောင် ကြော်မယ်ဆိုရင်..

 ၁။ ကြက်ဟင်းခါးသီးကို အထူကြီး မလှီးပါနဲ့။ ခပ်ပါးပါးလေးတွေပဲ လှီးပါ။

 ၂။ လှီးထားတဲ့ ကြက်ဟင်းခါးသီးတွေကို ဆားနဲ့ နယ်ပြီး ၁၅ မိနစ်လောက် နှပ်ထားပါ။

၃။ ပြီးရင် ရေနဲ့ ၅ ကြိမ်လောက် ဆေးကြောပါ။

၄။ ပြီးရင်  ရေကို သေချာညှစ်ချပြီး ရေစစ်ထားပါ။

၅။ အဆာပလာအဖြစ် ပုစွန်ခြောက်အကောင်လေးတွေကို ရေစိမ်ပြီး မညက်တညက် ထောင်းထားပါ။

၆။ ငရုတ်သီးအစိမ်းမှုန့်၊ ကြက်သွန်ဖြူ၊ ကြက်သွန်နီ၊ ချင်းတို့ကို တစ်ဆုံ ထောင်းထားပါ။

၇။ ကြော်မယ်ဆိုရင် ဆီနိုင်နိုင်သတ်ပါ။ ကြက်ဟင်းခါးသီးကို ဆီနဲ့ပဲ အိသွားအောင် ကြော်ရပါမယ်။ မနူးလို့ဆိုပြီး ရေထည့်ရင် အခါးတွေ ပိုထွက်လာပါလိမ့်မယ်။

၈။ မတူးအောင် မွှေပြီး ကြက်ဟင်းခါးသီး နူးအိလာခါနီးလေ မွှေလေ လုပ်ပေးပါ။

၉။ ကြက်ဟင်းခါးသီးလေးတွေ အစိမ်းရောင်ပျောက်ပြီး အိလာပြီဆိုရင်တော့ အိုးချလို့ရပါပြီ။

ဆီများများနဲ့ ကြော်တာဆိုတော့ စားခါနီးရင် ဆီတွေ ခပ်ထုတ်ထားဖို့ မမေ့ပါနဲ့နော်။

ကဲ..ဒီလိုဆိုရင်တော့ အရသာရှိပြီး အိအိလေးနဲ့ မခါးတဲ့ကြက်ဟင်းခါးသီးလေးတစ်ခွက် ရပါပြီနော်..။

ရေးသားသူ- နှင်းဖြူဖြူ

မှီငြမ်း- ချက်နည်းပြုတ်နည်းမှတ်စု။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။