ယခုတစ်ပတ်အတွင်း စျေးနှုန်းအပြောင်းအလဲဖြစ်ပေါ်ခဲ့သည့်သီးနှံများ

(၁၇.၉.၂၀၁၈ မှ ၂၁.၉.၂၀၁၈)ထိ

ဆန်၊ စပါး

ဒီတစ်ပတ်မှာတော့ ရန်ကုန်ဝါးတန်းဈေးကွက်မှာ ဆန်ကြမ်းဈေးတွေ တက်လာခဲ့သလို ဆန်ချောဈေးတွေလည်း တက်လာခဲ့ပါတယ်။ အရောင်းအဝယ်ကတော့ ဈေးတက်လာပေမယ့် ကောင်းနေပါတယ်။ ဆန်အဝင်ကလည်း ပုံမှန်ရှိနေပါတယ်။ လက်ရှိမှာ ငွေလဲလှယ်နှုန်းတွေ တက်နေတာကလည်း ဆန်ဈေးကိုတက်နေသလို လှောင်သူတွေကြောင့်လည်း ဈေးက ဆက်ပြီးတက်နေပါတယ်။

ဒီတစ်ပတ် ရန်ကုန်ဝါးတန်းဈေးကွက်မှာ တက်နေတာက ဆန်ကြမ်းဖြစ်တဲ့ မြီးဒုံးဆန်းက တစ်အိတ်ကို ၁၀၀၀ ကျပ်ဈေးတက်သွားပြီး ဒီတစ်ပတ်ပေါက်ဈေးက ၄၂၀၀၀ ကနေ ၄၄၀၀၀ ပေါက်ဈေးရှိပါတယ်။ ဧည့်မထ ၂၅ % တန်ဆန်ကလည်း တစ်အိတ်ကို ၁၀၀၀ ကျပ် ဈေးတက်လာပြီး ဒီတစ်ပတ်ပေါက်ဈေးက ၂၁၈၀၀ ကနေ ၂၂၀၀၀ ပေါက်ဈေးရှိပါတယ်။ရက် ၉၀ ဆန်က တစ်အိတ်ကို ၂၅၀၀၀ ကနေ ၂၅၅၀၀ ပေါက်ဈေးရှိပြီး အနိမ့် ဆုံးဈေး ၁၀၀၀ ကျပ်ဈေးတက်လာပါတယ်။သီးထပ်ရှယ်ကလည်း တစ်အိတ်ကို ၂၃၂၀၀ ကနေ ၂၄၂၀၀ ရှိပြီး တစ်အိတ်ကို ၇၀၀ ကျပ် အသီးသီးဈေးတက်လာပါတယ်။

ပုသိမ်ဈေးကွက်မှာတော့ ဆန်ဈေးရော စပါးဈေးပါ တက်လာခဲ့ပါတယ်။ ဧရာဝတီပေါ်ဆန်းစပါးကတော့ တင်း ၁၀၀ ကို ၁၂၇၉၀၀၀ ပေါက်ဈေးရှိပြိး တင်း ၁၀၀ ကို ၃၅၀၀၀ ကျပ် ဈေးတက်လာပြိး ဆန်ကတော့ တစ်တင်းခွဲတစ်အိတ်ကို ၅၂၀၀၀ ပေါက်ဈေးရှိပြီး ၃၀၀၀ ကျပ်ဈေးတက်လာပါတယ်။ ပေါ်ဆန်းရင်ကတော့ တင်း ၁၀၀ ကို ၃၅၀၀၀ တက်လာပြီး တင်း ၁၀၀ ကို ၁၁၇၄၀၀၀ ရှိပါတယ်။ ဆန်ကတော့ တစ်တင်းခွဲကို ၅၄၁၀၀၀ နဲ့ တစ်တင်းခွဲ ကို ၄၀၀၀ ကျပ်ဈေးတက်လာပါတယ်။ဖျာပုံပေါ်ဆန်းစပါးကလည်း တင်း ၁၀၀ ကို ၁၁၈၅၀၀၀ ရှိပြီး ၃၅၀၀၀ ဈေးတက်လာကာ ဆန်က ၃၀၀၀ ကျပ် တက်လာပြီး ၅၂၀၀၀ ပေါက်ဈေးရှိပါတယ်။

ဒုတိယတန်းစားစပါးဖြစ်တဲ့ ရွှေသွယ်လေးကတော့ တင်း ၁၀၀ ကို ၈၂၈၀၀၀ ရှိပြီး ၁၈၀၀၀ ကျပ်၊ဆန်ကတော့ တစ်တင်းခွဲကို ၃၅၀၀၀ ရှိပြီး ၁၀၀၀ ကျပ် ဈေးတက်လာပါတယ်။ဧရာမင်း စပါးကတော့ တင်း ၁၀၀ ကို ၈၀၉၆၀၀ ရှိပြီး ၉၀၀၀ ကျပ် ဆန်ကတော့ တစ်တင်းခွဲကို ၃၅၀၀၀ ရှိပြိး ၁၀၀၀ ကျပ်၊ မနောသုခ စပါးက တင်း ၁၀၀ ကို ၆၈၀၀၀၀ ရှိပြီး ၃၆၀၀၀ ကျပ် ဆန်ကတော့တစ်တင်းခွဲကို ၂၈၀၀၀ ရှိပြီး ၂၀၀၀ ကျပ်၊မီးကောက် စပါးကတော့ တင်း ၁၀၀ ကို ၇၀၈၀၀၀ ရှိပြီး ၁၈၀၀၀ ကျပ်၊ ဆန်ကတော့ တစ်တင်းခွဲကို ၃၀၀၀၀ ကျပ်ရှိပြီး ၁၀၀၀ ကျပ်၊သီးထပ်ရင်ကတော့ တင်း ၁၀၀ ကို ၆၀၇၀၀၀ ရှိပြီး ၉၀၀၀ ကျပ်ရှိပြီး ဆန်ကတော့ တစ်တင်းခွဲ ကို ၂၄၅၀၀ နဲ့ ၅၀၀ ကျပ် စသဖြင့် အသီးသီးဈေးတက်လာခဲ့ပါတယ်။

ပုသိမ်ဈေးကွက်မှာ ဆန်ဈေးတွေ ငြိမ်နေတာ တစ်လနီးပါးရှိခဲ့ပေမယ့် စက်တင်ဘာလ နောက်ဆုံးအပတ်မှာ ဈေး ပြောင်းလဲ လာပါတယ်။

မတ်ပဲ (FAQ/RC)

မတ်ပဲကတော့ ဒီတစ်ပတ်မှာ ရန်ကုန်ဈေးကွက်မှာ ပြီးခဲ့တဲ့ အပတ်နဲ့နှိုင်းယှဉ်ရင် ဈေးအတက်အကျသိပ်မရှိပေမယ့် နယ်ကုန်စည်ဒိုင်တွေမှာတော့ မတ်ပဲဈေးနှုန်းတွေ တက်လာခဲ့ပါတယ်။ ပြည်ပဝယ်ယူမှုနည်းပေမယ့် ငွေဈေးက ဆက်တိုက်ကို တက်နေတာဖြစ်တဲ့အတွက် လက်ရှိမှာမတ်ပဲက ဈေးပိုရနေပါတယ်။

မတ်ပဲက ရန်ကုန်ဈေးကွက်မှာ တစ်တန် ကို ၅ သိန်းကျော်နဲ့ဈေးအတက်အကျ အနည်းငယ် ရှိပါတယ်။ မုံရွာဈေးကွက်မှာတော့ တစ်တင်းကို ၁၇၀၀၀ နဲ့ ၁၀၀၀ ကျပ်၊ နေပြည်တော်ကုန်စည်ဒိုင်မျာလည်း တစ်တင်းကို ၁၆၀၀၀ ကျပ်နဲ့ ၁၀၀၀ ကျပ်၊ ပြည်ကုန်စည်ဒိုင်မှာတော့ တစ်တင်းကို ၁၇၅၀၀ နဲ့ ၅၀၀ ကျပ် အသီးသီးဈေး တက်လာခဲ့ပါတယ်။

ပဲစင်းငုံနီ

ပဲစင်းငုံနီကလည်း ပြီးခဲ့တဲ့အပတ်ကတည်းက ဈေးတက်လာခဲ့တာဖြစ်ပေမယ့် ဒီတစ်ပတ်မှာတော့ ဈေးတက်တာမဟုတ်ပဲ အတက်အကျအနည်းငယ် အပြောင်းအလဲသာ ရှိခဲ့ပါတယ်။ရန်ကုန်ဈေးကွက်မှာ ဈေးက အတက်အကျ ရှိနေပေမယ့် နယ်ကုန်စည်ဒိုင်တွေမှာတော့ ဈေးက ကျဆင်းနေတာကိုလည်း တွေ့ရပါတယ်။ ငွေဈေးကြောင့် ဈေးကကျဆင်းသွားတာ မဟုတ်ပေမယ့် အရောင်းအဝယ်က ကျဆင်းနေတဲ့အတွက် ဈေးကအနည်းငယ်ပြန်ကျဆင်းသွားတယ်လို့ ဆိုရပါတယ်။

ပြီးခဲ့တဲ့အပတ်က တရုတ်က အဝယ်လိုက်လာတဲ့အတွက် ဈေးကတစ်ပတ်အတွင်း မြင့်တက်လာခဲ့ပါတယ်။ မုံရွာဈေးကွက်မှာ ပဲစင်းငုံနီက တစ်တင်းကို ၁၃၇၅၀ နဲ့ တစ်တင်းကို ၇၅၀ ကျပ်၊ပခုက္ကူကုန်စည်ဒိုင်မှာတော့ တစ်တင်းကို ၁၄၁၅၀ ရှိပြီး တစ်တင်းကို ၈၅၀ ကျပ်၊ပြည်ဈေးကွက်မှာတော့ တစ်တင်းကို ၁၃၅၀၀ နဲ့ ၅၀၀ ကျပ် အသီးသီး ဈေးကျဆင်းသွားခဲ့ပါတယ်။

ကုန်သည်တွေကတော့ ငွေဈေးကြောင့် ဈေးပြန်တက်နိုင်တယ်လို့ခန့်မှန်းထားပေမယ့် ဈေးက မတက်ပဲကျဆင်းသွားခဲ့ပါတယ်။ လတ်တလောမှာတော့ ပြီးခဲ့တဲ့သြဂုတ်လအတွင်း ဈေးကျဆင်းတဲ့ နှုန်းအထိတော့ မရောက်ရှိနိုင်တာကို တွေ့ရပါတယ်။

ပဲတီစိမ်း

ပဲတီစိမ်းကတော့ ပြိးခဲ့တဲ့ အပတ်ကလည်း ဈေးကျဆင်းသွားခဲ့ပြီး ဒီတစ်ပတ်မှာလည်းဈေး က ကျဆင်းသွားခဲ့ပါတယ်။ လက်တလောမှာတော့ ပဲတီစိမ်းက အရောင်းအဝယ်နည်းနေတဲ့အတွက် ဈေးကအနည်းငယ်ကျဆင်းသွားခဲ့တာဖြစ်ပြီးတော့ ငွေဈေးအတက်ကြောင့် ကုန်သည်တွေအနေနဲ့ အများအပြား ဝယ်ယူတာမရှိပဲ စောင့်ကြည့်နေတဲ့ အခြေအနေလည်း ဖြစ်နေပါတယ်။ 

တရုတ်က အများအပြားအဓိက ဝယ်ယူတာဖြစ်တဲ့အတွက် ဈေးကျဆင်းပေမယ့် ယခုထက် ပိုပြီးတော့ ဈေးကျနိုင်ခြေမရှိဘူးလို့ ကုန်သည်တွေကတော့ ခန့်မှန်းထားပါတယ်။

မုံရွာကုန်စည်ဒိုင်ဈေးကွက်မှာ ပဲတီစိမ်းက တစ်တင်းကို ၂၆၀၀၀၀ ကနေ ၂၇၇၅၀ ကျပ်ရှိပြီး တစ်တင်းကို ၅၀၀ ကျပ်၊ မြင်းခြံကုန်စည်ဒိုင်မှာတော့ တစ်တင်းကို ၁၉၉၅၀ ကျပ်ရှိပြီး ၂၈၅၀ ကျပ်၊ နေပြည်တော်ကုန်စည်ဒိုင်မှာတော့ တစ်တင်းကို ၂၅၀၀၀ ရှိပြီး ၁၀၀၀ ကျပ်၊ ပခုက္ကူကုန်စည်ဒိုင်မှာတော့ တစ်တင်းကို ၂၉၇၅၀ ရှိပြီး တစ်တင်းကို ၈၅၀ ကျပ်၊ အသီးသီးဈေးကျဆင်းသွားခဲ့ပြိး ပြည်ကုန်စည်ဒိုင်မှာတော့ တစ်တင်းကို ၂၇၅၀၀ နဲ့ ဈေးငြိမ်နေပါတယ်။

အိသန္တာအောင်(AMIA)