တရုတ်နိုင်ငံမှတင်သွင်းသည့်ပန်းများ အဝင်နည်းလာသဖြင့် မြန်မာ့လီလီပန်းရောင်းအားတက်နေ

    ပြည်တွင်းဈေးကွက်အတွင်းသို့ တရုတ်နိုင်ငံမှတင်သွင်းသည့်ပန်းများ ဝင်ရောက်မှုနည်းပါးလာသည့်အတွက် မြန်မာ့လီလီပန်း ဝယ်လိုအားများပြားလာပြီး ရောင်းအားတက်နေကြောင်း ပန်းဈေးကွက်အတွင်းမှ သိရသည်။

လီလီပန်းကတော့ ဈေးကွက်ကမပျက်ပါဘူး။ အခုလောလောဆယ်မှာ ရောင်းအားကောင်းနေပါတယ်။ တရုတ်ပြည်နဲ့ မန္တလေးကြားမှာ လမ်းပန်းဆက်သွယ်မှုအပိုင်း နှောင့်နှေးမှုလေးတွေ ဖြစ်ပေါ်နေတာကြောင့် အခုလပိုင်းတွေမှာ ကုန်ကားတွေ ဝင်ရောက်မှုနည်းသွားတဲ့အတွက် တရုတ်ပန်းတွေလည်း အဝင်နည်းလာတယ်။ ဒါကြောင့်လည်း ပြည်တွင်းမှာစိုက်ပျိုးတဲ့ လီလီပန်းတွေ အခုလိုမျိုးအရောင်းသွက်လာတာပါ။

ဟု မန္တလေးတိုင်း၊ ပြင်ဦးလွင်မြို့မှ လီလီပန်းစိုက်ပျိုးသူ ဦးသိကြားမင်း က ပြောသည်။

    လီလီပန်းများသည် ဘုရားပန်းကပ်လှူရာတွင်၊ ပန်းအလှဆင်ရာတွင် တာရှည်အထားခံခြင်း၊ အရောင်အဆင်းအားဖြင့် လှပတင့်တယ်ခြင်း၊ မွှေးရနံ့ထူးခြားကောင်းမွန်ခြင်း စသည့် အချက်များကြောင့် လူအများစု ကြိုက်နှစ်သက်ကြခြင်းဖြစ်သည်။

နယ်တွေကို တင်ပို့တဲ့အခါမှာ လီလီပန်းတွေကို သေချာစည်းပြီး အိပ်အကြည်တစ်ထပ် စွပ်ပါတယ်။ ပြီးရင် ဖာထဲထည့်ပိတ်ပြီးတော့ မှာယူတဲ့သူတွေနေထိုင်ရာ ကားဂိတ်တွေကို တင်ပို့ပေးနေပါတယ်။ ရန်ကုန်မြို့ကိုသာမက တခြားမြို့တွေကရော ဝယ်လက်တွေရှိပါတယ်။ တခြားပန်းတွေထက် ဈေးကောင်းတာကတော့ မျိုးဥတစ်ဥကို မြန်မာပြည်အရောက် ၇၀၀ ကျပ်, ၈၀၀ ကျပ် ဈေးနှုန်းပေးပြီး ဝယ်ယူစိုက်ပျိုးရတာ မို့လို့ပါ။ မျိုးဥက နယ်သာလန်က တိုက်ရိုက်ဝယ်ယူစိုက်ပျိုးတာ ဖြစ်ပါတယ်။

ဟု ၎င်းက ဆက်လက်ပြောသည်။

    ပြည်တွင်း၌ လီလီပန်းတစ်ပင်လျှင် လက်ကားစျေး ၁၁၀၀ ကျပ်, ၁၂၀၀ ကျပ်, ၁၃၀၀ ကျပ် ဈေးနှုန်းများဖြင့် တင်ပို့ရောင်းချနေသည်။

ဆောင်းပါးများ/သတင်းများ ပြန်လည်ကူးယူဖော်ပြပါက "အစိမ်းရောင်လမ်းမှ ပြန်လည်ကူးယူဖော်ပြပါသည်" ဟု ထည့်ပေးပါရန် မေတ္တာရပ်ခံအပ်ပါသည်။