မျိုးစေ့ထုတ် တောင်သူများနှင့် စိုက်ပျိုးရေးဝန်ထမ်းများထံ စပါးအထွက်တိုးနည်းပညာစာအုပ် နှစ်ထောင်ကျော်ဖြန့်ဝေပေးမည်

ရန်ကုန်၊ သြဂုတ် ၂၄

   မြန်မာနိုင်ငံဆန်စပါးအသင်းချုပ်က ဆန်စပါးစိုက်ပျိုးထုတ်လုပ်သည့် တောင်သူများထံ စပါးအထွက်တိုး နည်းပညာအခြေခံဖြင့် မျိုးကောင်းမျိုးသန့်စိုက်ပျိုးထုတ်လုပ်ပုံနည်းလမ်း စာအုပ်နှစ်ထောင်ကျော် ဖြန့်ဝေပေးအပ်မည်ဖြစ်ကြောင်း မြန်မာနိုင်ငံဆန်စပါးအသင်းချုပ်ထံမှ သိရသည်။

   သြဂုတ်လ ၂၃ ရက်နေ့က ရန်ကုန်မြို့၊ မင်းရဲကျော်စွာလမ်းရှိ မြန်မာနိုင်ငံဆန်စပါးအသင်းချုပ်တွင် အသင်းဝင်တောင်သူအချို့ထံ ယင်းစာအုပ်များ ဖြန့်ဝေပေးအပ်ခဲ့သည်။ 

   မြန်မာနိုင်ငံဆန်စပါးအသင်းချုပ်နှင့် Welthungerhlife-WHH တို့ ပူးပေါင်းရေးဆွဲထားသည့် စပါးအထွက်တိုး နည်းပညာအခြေခံဖြင့် မျိုးကောင်းမျိုးသန့် စိုက်ပျိုးထုတ်လုပ်ပုံနည်းလမ်းစာအုပ်အပြင် ဆန်စပါးအသင်းချုပ်နှင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနတို့ ပူးပေါင်းဆောင်ရွက်ခဲ့သည့် မြန်မာ့ပေါ်ဆန်းမွှေး၏ အတိတ်၊ ပစ္စပ္ပုန်နှင့် အနာဂတ်အလားအလာဆွေးနွေးပွဲမှ စာတမ်းများနှင့် အကြံပြုချက်များ စုစည်းထုတ်ဝေထားသည့် စာအုပ်ကိုလည်း ပေးအပ်ခဲ့ခြင်းဖြစ်သည်။

   “စာအုပ်ထုတ်ဖို့ တောင်သူတွေအနေနဲ့ ဘာလိုအပ်လဲ မျိုးစေ့ထုတ်တဲ့တောင်သူတွေအနေနဲ့ ဘာအခက်အခဲတွေရှိလဲဆိုတာကို ဧရာဝတီတိုင်းဘက်ကိုကွင်းဆင်းပြီး တောင်သူတွေနဲ့ တွေ့ဆုံမေးမြန်းရပါတယ်။ မျိုးစေ့ပေးမယ့် စိုက်ပျိုးရေးဝန်ထမ်းတွေနဲ့လည်းတွေ့တယ်။ စိုက်ပျိုးရေးဝန်ထမ်းတွေက ပေးနိုင်မယ့်အခြေအနေတွေ၊ မျိုးစေ့ထုတ်တဲ့လယ်သမားတွေက စိုက်ပျိုးနိုင်မယ့်အနေအထားတွေ၊ ဘာမျိုးစိုက်သင့်တယ်ဆိုတာ အဲဒါတွေကအစ အကုန်လုံးတွေ့ဆုံမေးမြန်းပြီးတော့မှ ထုတ်တဲ့အတွက် စာအုပ်ထုတ်ဖို့ တစ်နှစ်နီပါးလောက်ကြာသွားတယ်” ဟု မြန်မာနိုင်ငံဆန်စပါးအသင်းချုပ် အကြံပေး ဒေါက်တာမင်းအောင်က ပြောကြားသည်။

   လက်ရှိတွင် စပါးအထွက်တိုး နည်းပညာအခြေခံဖြင့် မျိုးကောင်းမျိုးသန့် စိုက်ပျိုးထုတ်လုပ်ပုံနည်းလမ်းစာအုပ် နှစ်ထောင်ခန့်ထုတ်လုပ်ထားပြီး စာအုပ်တစ်ထောင်ကို ဧရာဝတီတိုင်းဒေသကြီးရှိ စိုက်ပျိုးရေးဝန်ထမ်းများနှင့် မျိုးစေ့ထုတ်သည့်တောင်သူများကို ဖြန့်ဝေပေးပြီးဖြစ်ကြောင်း ၎င်းကပြောဆိုသည်။

   ထို့ပြင် အခြားတိုင်းနှင့် ပြည်နယ်များရှိ စိုက်ပျိုးရေးဝန်ထမ်းများနှင့် မျိုးစေ့ထုတ်တောင်သူများကို စာအုပ်များထပ်ထုတ်ကာ ဖြန့်ဝေပေးရန်အတွက် စိုက်ပျိုးရေးဦးစီးဌာန ညွန်ကြားရေးမှူးချုပ်နှင့် ညှိနှိုင်းထားပြီးဖြစ်ကြောင်း ဆန်စပါးအသင်းချုပ်မှ သိရသည်။

   စာအုပ်ပေးအပ်ပွဲကို မြန်မာနိုင်ငံဆန်စပါးအသင်းချုပ်မှ တာဝန်ရှိသူများ၊ စိုက်ပျိုးရေးဦးစီးဌာနမှ တာဝန်ရှိသူများ၊ ရန်ကုန်နှင့် ပဲခူးတိုင်းဒေသကြီးတို့မှ အသင်းဝင်တောင်သူ ကိုယ်စားလှယ်များ တက်ရောက်ခဲ့ကြသည်။ 

အေးအေးမြင့်(ABM)