လျှော်ဖြူစိုက်ပျိုးထုတ်လုပ်ခြင်း

အပင်၏ အစေးကြောအလွှာမှ အစေးကိုထုတ်ယူကာရောင်းချရသော လျှော်ဖြူသည် စီးပွားရေး တွက်ခြေကိုက်မှုကြောင့် စိုက်ပျိုးထုတ်လုပ်သူများ တစ်နှစ်ထက်တစ်နှစ် ပိုမိုများပြားလာသည်။ မြန်မာနိုင်ငံလျှော်ဖြူ စိုက်ပျိုးထုတ်လုပ်ကြသူများအသင်:၏ လျှော်ဖြူစိုက်ဧက ကောက်ခံမှုအရ ဧက ၃၀၀၀၀ ကျော်ရှိနေပြီ ဖြစ်သည်။ နှစ်ရှည်ပင်ဖြစ်ပြီး ၅ နှစ်သားခန့်မှစကာ နှစ်ပေါင်း ၈၀ ခန့်ထိ နှစ်စဉ် ၈ လမှ ၁၀ လထိ အစေးထုတ်ယူ ကြရသည့်အပြင် လျှော်ဖြူစျေးကွက်မှာ လွန်ခဲ့သော ၃ နှစ်ကထက် ၄ ဆခန့်ထိ ခုန်တက်လာသောကြောင့် စီးပွားဖြစ် စိုက်ပျိုးထုတ်လုပ်သူများမှာ နှစ်စဉ် တိုးပွားလျက်ရှိသည်။ ၂၀၁၄ ခုနှစ်တွင် လျှော်ဖြူအစေး အဖြူတစ်ပိသာ ၁၂ဝဝဝ ကျပ် ယခု ၂၀၁၇ ခုနှစ်တွင် လျှော်ဖြူအစေး ၁ပိဿာ ၄၅၀၀၀ ကျပ် ဟူ၍ ပေါက်စျေးရှိခဲ့သည်။

လျှော်ဖြူဟူသည် မြန်မာနိုင်ငံတွင် အလေ့ကျပေါက်ပင်အဖြစ် ပေါက်ရောက်လျက်ရှိပြီး ၁၉၈၀ ခုနှစ်ခန့် ကတည်းမှ သစ်မဟုတ်သော သစ်တောထွက်ပစ္စည်းအနေဖြင့် တရုတ်နိုင်ငံသို့ တင်ပို့ရောင်းချနိုင်ခဲ့ သကဲ့သို့ ပြည်တွင်းတွင် ဆေးကုလားမအဖြစ် စားသောက်ကြသည်ကိုတွေ့ရသည်။ တောတွင်း အလေ့ကျပေါက်ပင် များအား အစေးထုတ်ရောင်းချရာမှာ စီးပွားရေး တွက်ခြေကိုက်ခြင်းကြောင့် ထိုအလေ့ကျပေါက်ပင်များမှ မျိုးစေ့များ ယူကာ ဥယျာဥြ်ုခံများအဖြစ် တည်ထောင်ပြီး စီးပွားဖြစ် စိုက်ပျိုးလာကြသည်။

လက်ရှိ အစေးထုတ်ရောင်းချနေကြသော ခြံများအားလုံးသည် မြန်မာနိုင်ငံဒေသမျိုးရင်း လျှော်ဖြူမျိုးများသာ ဖြစ်ပြီး စိုက်ပျိုး ထိမ်းသိမ်းရ လွယ်ကူသော အပင်များ ဖြစ်သည်။ လျှော်ဖြူသည် ပူနွေးစိုစွတ်သော ရာသီဥတုကို ကြိုက်ပြီး ရေငတ်ဒဏ်ကိုကောင်းစွာခံနိုင်သော အပင်ဖြစ်သော်လည်း ရေဝပ်ရေကြီးခြင်းဒဏ်ကို လုံးဝမခံနိုင်ပေ။ ထို့ကြောင့် ရေဝင်မြေ အစိုဓာတ်ကို ကြာရှည်ထိမ်းသိမ်းထားသောမြေများမှအပ ရေစီးရေလာကောင်းပြီး အပင်များ ဖြစ်ထွန်းသော မည်သည့်မြေတွင်မဆို စိုက်ပျိုးနိုင်သည်။

လျှော်ဖြူသည် သစ်တော၊ သစ်ပင် မဟုတ်သော်လည်း ဥယျာဉ်ခြံ အပင်ထဲတွင် ပါသောကြောင့် ဥယျာဉ်ခြံပင်များ ဖြစ်ကြသော သရက်၊ ပိန္နဲ၊ မာလကာတို့ ကဲ့သို့ စိုက်ပျိုး ထိန်းသိမ်းစောင်ရှောက်နိုင်သည်။ လျှော်ဖြူပင်သည် အပင်ကြီးမျိုး ဖြစ်သောကြောင့် ပင်ကြားတန်းကြားကို အပူပိုင်းဒေသများအတွက် ၁၅ပေ ပတ်လည် သို့မဟုတ် ပေ ၂၀ ပတ်လည် စိုက်သင့်ပြီး ပူနွေးစိုစွတ်သောဒေသများတွင်မူ ပေ၂၀ ပတ်လည် သို့မဟုတ် ၂၅ ပေ ပတ်လည်ထားကာ စိုက်ပျိုးသင့်သည်။ ထိန်းသိမ်းစောင့်ရှောက်မှုကောင်းပြီး ရေမြေကောင်းပါက ၄ နှစ်သားပင်လျှင် ပင်စည်၏ ရင်ဆို့လုံးပတ်မှာ ၂၇ လက်မခန့် ရှိပြီ ဖြစ်ပြီး စတင် အစေးထုတ်နိုင်သော အခြေနေတွင် ရောက်ရှိပြီ ဖြစ်သည်။

အစေး စတင်ထုတ်လုပ်ချိန်တွင် ကျွမ်းကျင်အစေး ထုတ်လုပ်သား တစ်ယောက်သည် အပင် ၁၅၀ ခန့်ကို နိုင်းနင်းစွာ အစေးထုတ်နိုင်ပြီး အစေး တစ်ပိသာနှင့်အထက်နေ့စဉ် ရရှိနေမည် ဖြစ်သည်။ အပင် ဆယ်နှစ်သားနှင့်အထက်တွင်မူ အစေးထုတ်ကိုင်းများ များပြားလာမှု့ကြောင့် အစေးထုတ်လုပ်သား တစ်ယောက်သည် တစ်ရက် အပင် ၁၀၀ ခန့်သာ နိုင်နိုင်နင်းနင်း အစေးထုတ်နိုင်ပြီး အစေး ၂ ပိဿာခန့် ရရှိမည် ဖြစ်သည်။
လျှော်ဖြူကို ဝမ်းနုတ်ဆေး၊ ဆီးရွှင်ဆေး၊ ဆေးတောင့်ခွန်၊ စားသောက်ကုန်၊ အလှကုန်နှင့် စက်မှု့ကုန်ကြမ်းများတွင် တွင်ကျယ်စွာ အသုံးပြုနေပြီဖြစ်သည်။ လက်ရှိ ပို့ဆောင်နေသော စျေးကွက် ၉၀ ရာခိုင်နှုန်းမှာ တရုတ်နိုင်ငံသို့ တင်ပို့ရောင်းချနေခြင်း ဖြစ်ပြီး စားသောက်ကုန်နှင့် ဆေးဝါးတွင် အဓိက အသုံးပြုလျက်ရှိသည်။ လျှော်ဖြူစျေးကွက်သည် စိုက်ပျိုးရေးထုတ်ကုန်များထဲတွင် နှစ် ၃၀ အတွင်း စျေးကွက်ပျောက်ဆုံးခြင်း လုံးဝမရှိသည့်အပြင် စီးပွားရေးတွက်ခြေ အကိုက်ဆုံး သီးနှံပင်များထဲတွင် ပါဝင်နေသည်။

အချုပ်ဆိုရသော ရင်ဆို့လုံးပတ် ၂၇ လက်မရှိသော လျှော်ဖြူ တစ်ဧက၏ တစ်နှစ် အသားတင်အမြတ်ငွေမှာ သိန်း ၅၀ နှင့်အထက်တွင် ရှိသည်။ အစေးထုတ် သက်တမ်းကြာလာလေ အပင်ကြီးလာပြီး အစေးရရှိမှု ပိုလာသောကြောင့် တစ်နှစ်ထက်တစ်နှစ် ဝင်ငွေပိုလာမည် ဖြစ်သည်။ ကုန်ချောထုတ်လုပ်မှု များသော ကုန်ကြမ်းဖြစ်သည့် အားလျော်စွာ စျေးကွက်လိုအပ်ချက် များပြားသည်။ အပူပိုင်း မိုးနည်းဒေသများနှင့် အပူပိုင်း မိုးများဒေသများတွင် အဓိကထား စိုက်ပျိုးသင့်သော သီးနှံဖြစ်သည်။ ပင်လယ်ရေ မျက်နှာပြင်အထက် ပေ ၇၀၀ ကျော်လျှင် အစေးထုတ် အခက်ခဲရှိသည့်အပြင် အစေးအရည်အသွေး ကျဆင်းမှုကြောင့် ပင်လယ်ရေ မျက်မျက်နှာပြင် အမြင့် ပေ ၇၀၀ အောက်သာ စိုက်သင့်သည်။

ကျော်မျိုးထွန်း
လျှော်ဖြူ စိုက်ပျိုးရေး