တရုတ်နံနံ စိုက်ပျိုနည်း (Celery cultivation)

၁။ ရာသီဥတု နှင့် မြေအမျိုးအစား လိုအပ်ချက်

စိုထိုင်း၍ အေးမြသော ရာသီဥတုတွင်ကောင်းစွာ ဖြစ်ထွန်းနိုင်သည်။ ခြောက်သွေ့သောဒေသတွင်လည်း သင့်တင့်လျောက်ပတ်သော ရေသွင်းခြင်း ပြုလုပ်ပေးပါက ကောင်းစွာ ဖြစ်ထွန်းနိုင်သည်။ မြေချဉ်ငန်ဓာတ် ၅.၆ ထက်ပိုသော မြေများမှလွဲ၍ မြေစေး၊ နုံးမြေ၊ သဲဆန်မြေ စသောမြေအမျိုးမျိုးတွင် ကောင်းစွာ ဖြစ်ထွန်းနိုင်သည်။

၂။ မျိုးစေ့နှုန်းထား

တရုတ်နံနံစေ့သည် ဗမာနံနံစေ့ကဲ့သို့ နှစ်ခြမ်းမဟုတ်ပါ။ တရုတ်နံနံ စေ့တစ်စေ့တွင် တစ်စေ့မှ တစ်ပင်သာပေါက်ရောက်သည်။ တိုက်ရိုက်ကြဲစိုက်နိုင် သကဲ့သို့ ပျိုးခင်းထဲတွင် ပျိုးပြီးမှလဲ ရွေ့စိုက်နိုင်သည်။ တစ်ဧကတွင် သုံးဆယ်သားထိ စိုက်ပျိုးနိုင်သည်။ စက်တင်ဘာလတွင် ပျိုးပါက အရိပ်ကင်းရှင်းစေမှု့ နှင့်ရေသွင်းမှု့ မှန်မှသာ ကောင်းစွာ ရှင်သန်နိုင်သည်။ မကြဲခင်ရေတစ်ည စိမ်ပါ။

အေဇိုစပိုရီလန် သုံးဆယ်ကျပ်သားနှင့် ရေကိုရောပြီးမျိုးစေ့ စိမ်ပါက ခါးရိရောဂါကို ကာကွယ်ပြီး ထရိုင်ဂိုဒါးမား ဗာရီဒေ ဆယ့်နှစ်ပိသာကို စိုက်မည့်မြေကြီးထဲတွင် ထည့်ပြင်ပါ။ အစေ့ချပြီး တစ်လကြာလျှင် အပင်ပေါက်သည်။

ပင်ကြားတန်းကြား တစ်ပေxငါးလက်မ သို့မဟုတ် နှစ်ပေxငါးလက်မခြား၍ရွေ့စိုက်ပါ။ သိပ်နက်နက် မစိုက်ရပါ။ သဘာဝအတိုင်းကောင်းစွာဆွေးမြည့်ထားသော သဘာဝမြေဆွေးကို ဆယ်တန်မှ ဆယ့်နှစ်တန်ထိ ထည့်သွင်းပါ။ ဓာတုဗေဒ မြေဆီသြဇာကို အသုံးပြုမည်ဆိုလျှင် ဆယ့်ငါးပတ်လည်ကို အချိန် နှစ်ရာ့ငါးဆယ် ( နှစ်ဆယ့်ငါးကီလို-အိတ်ဆယ်အိတ်)ကို ထည့်သွင်းပါ။ ရေအသွင်းအထုတ်ကောင်းမွန်ရန်နှင့် ရေမဝပ်ရန် အလွန်အရေးကြီးသည်။

၃။ ကြားပေါင်းလိုက်ခြင်း

နှစ်ရာသီ သီးနှံဖြစ်၍ ကြားပေါင်းလိုက်ခြင်း ကိုပုံမှန် လုပ်ကိုင်နိုင်ရန် လိုအပ်သည်။ ပိုမိုအဆင်ပြေစေရန် မြေကိုအုပ်၍ စိုက်ခြင်းက အကောင်းဆုံးပေါင်းနှိမ်ခြင်း ဖြစ်သည်။ ပေါင်းသတ်ဆေး အသုံးပြုလိုပါက လင်နုယမ် (linnuram) ကို နှစ်ပိသာကိုမြေပြင်စဉ်တွင် စတင် ထည့်သွင်းထားနိုင်သည်။ တရုတ်နံနံကို မြန်မာနိုင်ငံတွင် အရွက်နုကိုသာ စားသုံးသော်လည်း နိုင်ငံတကာတွင်မူ တရုတ်နံနံအရိုးကို အဓိက စားသုံးကြသဖြင့် ရိုးတံ ကိုကောင်းစွာရောင်းပန်းလှစေရန် ဦးစားပေးစိုက်ပျိုးကြသည်။

၄။ ပိုးမွှားနှင့် ရောဂါ

ပ်ပိုး

အဝါဖျော့ဖျော့အရောင်မှ အစိမ်းရောင်ထိရှိပြီး အပင်ရည်ကို စုပ်စားသောပိုးဖြစ်သည်။ အရွက်အောက်ဖက်တွင် နေထိုင်စားသောက်ကြပြီး အရွက်များကော့လန်၍ ပုံပျက်သွားစေသည်။
အေမီဒါကလိုပရစ်ကို ရေတစ်လီတာတွင် လက်ဖက်စားဇွန်းတစ်ဝက်ရော၍ ဖျန်းပါ။

ထွင်းပိုး

လောက်ကောင်အဆင့်တွင် အရွက်များဖြတ်ချ စားသောက်ပြီး ပင်စည်များကိုပါ ဖျက်ဆီးစားသောက်ကြသည်။ အရွက်ရိုးတံများကို ကိုက်ဖြတ်စားသောက်ကြသဖြင့် ရောင်းပန်း မလှတတ်ပါ။ ကာတပ်ကိုအသုံးပြုနိုင်သည်။

ခါးရိရောဂါ အတွက် ကာကွယ်ခြင်းကို ပြုလုပ်ထားပြီး ဖြစ်သော်လည်း လိုအပ်လျှင် ထရိုင်ဂိုးကိုအသုံးပြုပါ။

အရွက်လောင်ခြင်း

အရွက်ပေါ်တွင် အဝါပြောက်များစတင်ဖြစ်ပေါ်သည်။ ထို့နောက် မီးလောင်ပြင်သကဲ့သို့ မည်း၍ ပျက်စီးသွားသည်။

ရာသီဥတုပူနွေးပြီး စိုစွတ်သောအချိန်များတွင် ဖြစ်ပေါ်တတ်သည်။ မျိုးစေ့ဆောင်ရောဂါဖြစ်၍ ပိုမိုဂရုစိုက်ရန် လိုအပ်သည်။ မန်ကိုဇက် ကို အသုံးပြုပါ။

ရောင်မြုနီကွက်ကြားရောဂါ

အရွက်များအရောင်ပျက်ပြီး အဝါပြောက်များ တစ်ပင်လုံးတွင်ဖြစ်ပေါ်ကာ အရွက်များကို ရှုံ့တွစေသည်။ မန်ကိုဇက် ကိုအသုံးပြုပါ။

၅။ ခူးဆွတ် ရိတ်သိမ်းခြင်း

မျိုးစေ့ ရယူလိုပါက စိုက်ပြီးခြောက်လအကြာတွင် ပန်းပွင့်၍ အစေ့များခြောက်အောင်ထားပြီးခြွေယူ သိမ်းဆည်းရသည်။ စျေးကွက်က အရွက်နုကိုသာ ဝယ်ယူလိုလျှင် အရွက်နုကိုသာ ခူးဆွတ်ကြပြီး အချို့က ရိုးတံကိုရောင်းချလို၍ ရိုးတံကောင်းစွာ တုတ်လာပြီးရောင်းပန်းလှချိန်တွင် ခူးဆွတ်ကြသည်။ ရိုးတံကို ခူးဖြတ်လိုပါက စိုက်ပြီး လေးလမှငါးလအကြာတွင် ခူးဖြတ်နိုင်ပြီး အရွက်ကိုသာရောင်းချလိုပါက စိုက်ပြီး နှစ်လတွင်းတွင် စတင်ခူးဆွတ်နိုင်သည်။

အရွက်နုနုကို ခူးဆွတ်ပါက တစ်ဧကတွင် တန်ချိန် ခြောက်တန်ထိ ထွက်နိုင်ပြီး ရိုးတံကိုခူးဖြတ်ပါက တန်ချိန် ဆယ်တန်အထိ ထွက်ရှိနိုင်သည်။မျိုးစေ့အတွက် စိုက်ပျိုးပါက အထွက် ပိဿာ ငါးရာကျော်ထိ ထွက်ရှိနိုင်သည်။

ရွှေရည်လင်း